TIC TIMOR FÓ FORMASAUN SISTEMA CLOUD GoTL NO SISTEMA EMAIL OFISIÁL BA FUNSIONÁRIU MESSK

DILI, 15 Abril 2024- Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) nomós Diresaun Sentru Dadus fó formasaun Sistem Cloud GoTL no Sistema Email Ofisiál ba funsionáriu na’in 20 husi Ministériu Ensinu Superior Siénsia no Kultura (MESSK). 

Objetivu husi formasaun ne’e, atu fasilita funsionáriu sira hodi utiliza Sistema Cloud no Sistema Email Ofisiál hodi halo arkivamentu ba dadus no bele envia dokumentu ofisiálmente. 

Bazeia ba programa IX Governu Konstitusionál númeru 2.8 ne’ebé ko’alia kona-ba Teknolojia Informasaun no Komunikasaun no programa 6.7 ko’alia kona-ba Governu Eletróniku.  TIC TIMOR iha responsabilidade ba polítika ICT nian nomós Governu Eletróniku ne’ebé atu kapasita funsionáriu sira hodi bele estandariza koñesimentu ba ICT iha Timor-Leste.

Iha abertura ba formasaun ne’e, Diretór Jerál Planeamentu no Finansas MESSK Sr. Hernậni Viterbo da Costa Soares, agradese ba TIC TIMOR ne’ebé fó formasaun relevante ICT nian ba funsonáriu sira. Ida ne’e la’os foin hahú maibé MESSK koopera ho TIC TIMOR kleur ona hanesan dezenvolve Website Ofisiál no Email Ofisiál. 

DJ informa, TIC TIMOR mós konekta ona liña internet ba MESSK hein katak, prosesu ba Fibra Ótika Kabu Submariñu la’o ho di’ak, bele fasilita di’ak liu tan maibé kestaun prinsipal maka sistema Dalan ba Futuru, Sistema Jestaun Finansas Públika nian to’o agora la’o ho di’ak no ida ne’e bele benefisia ona MESSK. 

Ho supporta husi TIC TIMOR prepara ona MESSK futuramente Governu deside atu utiliza Governu Eletróniku, MESSK prontu ona no bele mellora di’ak liu tan.

Liu husi kapasitasaun rekursu umanu mós bele di’ak liu tan ho kooperasaun ne’ebé halo ona ho TIC TIMOR Tanba oportunidade ida ne’e, la’os ikus maibé hein katak ba futuru TIC TIMOR sei kontinua suporta Ministériu hotu-hotu inklui MESSK atu bele tuir pólitika Governu nian hodi  hamenus uza sura-tahan ba prosesu dezenvolvimentu institusionál.

Iha fatin hanesan Xefe Departamentu Dezenvolvimentu Inplantasaun no Integrasaun Sistema TIC TIMOR Sr. Geovanio Frederico Vinhas hatete, TIC TIMOR liu husi Diresaun Dezenvolvimentu Sistema Informasaun no Aplikasaun (DDSIA) halo ona desiminasaun informasaun no fó formasaun ba sistema sira ne’ebé TIC TIMOR dezenvolve ona husi kapasidade tékniku sira ne’ebé iha.

Bazeia ba pedidu ne’ebé hato’o ba TIC TIMOR hodi dezenvolve sistema rua hanesan Sistema Cloud GoTL ninia objetivu maka atu halo arkivamentu ba dokumentu sira, kalendarizasaun no seluk tan. Nomós Sistema Email Ofisiál ninia objetivu  importante tebes tanba bele komunika ba malu ofisialmente.  Iha mundu informátika ema koñese liu Email Ofisiál tanba ne’e TIC TIMOR la’os oferese dei’t ba MESSK maibé iha Insituisaun Estadu lubuk ida ona maka uza hela Email Ofisiál ne’e inklui órgaun Presidénsia Repúblika, Parlamentu Nasionál nomós Tribunal Rekursu. 

Liu husi biban ne’e, ho naran TIC TIMOR agradese ba MESSK ne’ebé fó fiar ona ba TIC TIMOR hodi dezenvolve sistema hirak ne’e no hein katak, iha loron hira nia laran formasaun bele la’o ho di’ak.

Entretantu formasaun ne’e sei hala’o durante loron haat (4) iha edifísiu MESSK Kolmera. 

(MÉDIA TIC)