TÉKNIKU AJÉNSIA TIC TIMOR I.P. FÓ FORMASAUN SISTEMA OFÍSIU BA FUNSIONÁRIU IDN

DILI, 18 Janeiru 2024- Tékniku Ajénsia TIC TIMOR I.P., liu hosi Diresaun Dezenvolvimentu Sistema Informasaun no Aplikasaun (DDSIA) fó formasaun istema ofísiu ba Funsionáriu sira hosi Institutu Defeza Nasionál (IDN).

Sistema Ofísisu ne’e, ninia objetivu atu fasilita funsionáriu sira hodi dijitaliza karta-tama no karta-sai inklui arkiva karta atu nune’e, bele hatene  karta ne’ebé distribui ona no ida  ne’ebé arkiva.

Iha serimónia abertura ba formasaun ne’e, Vise-Diretór Ezekutivu TIC TIMOR I.P., Sr. Eligio Moniz do Rego esplika katak, Ajénsia TIC TIMOR nu’udar institutu públiku ne’ebé ho ninia natureja jurídika autonomia administrativa finaseira no patrimóniu rasik ho vizaun atu responsabiliza ba utilizasaun teknolojia informasaun no komunikasaun ne’ebé intelijente liu ba Governu.

Tanba ne’e, papel TIC TIMOR nian, hakarak haforsa parseiru sira iha insituisaun estadu nomós entidade públika sira iha Timor-Leste, liu-liu iha área teknolojia informasaun no komunikasaun no bele fanun aan dadauk ona hodi utiliza teknolojia sai hanesan faze modernizasaun iha área servisu, maske neneik maibé bebeik fiar katak, sei halakon sistema manual iha instituisaun relevante sira. 

Vise-Diretór Ezekutivu TIC TIMOR I.P. mós informa katak, ohin loron ne’e mós iha ajenda importante rua, ida maka formasaun kona-bá Sistema Ofísisu iha IDN no seluk tan maka TIC TIMOR servisu hamutuk ho Ministériu Justisa halo lansamentu Sistema Ajendamentu-Online ba Diresaun Nasionál Rejistu Notariadu no ida ne’e, sai hanesan pilotu ida ba instituisaun sira seluk.  TIC TIMOR mós prontu  atu simu ideia no sujestaun sira atu bele implementa transformasaun dijitál iha era modernizasaun ne’e.

“Tanba ne’e, ho formasaun no implementasaun Sistema Ofísiu ne’e, nu’udár pasu dahuluk iha kolaborasaun entre TIC TIMOR ho IDN ba implementasaun sistema dijitál iha ambiente servisu IDN ne’e rasik, hodi responde ba era tranformasaun dijitál iha nasaun Timor-Leste. Anteriormente mós, TIC TIMOR hamutuk ho Diresaun Nasionál Infraestrutura no Komunikasaun (DNIK) monta ona infraestrutura rede, hodi suporta konetividade intranet & internet bá IDN” dehan Vise-Diretór Ezekutivu.

Iha fatin hanesan Diretór Ezekutivu Interinu Institutu Defeza Nasionál (IDN) Sr. Guilherme Soares hatete, formasaun ida ne’e hola parte ba formasaun funsionáriu sira atu bele kapasita funsionáriu sira atu bele dezenvolve liu tan sira nia abilidade iha administrasaun públika.Feramenta sira ne’ebé aprende iha formasaun ne’e bele ajuda hodi solusiona jestaun ofísiu siira hanesan karta tama karta sai nian. Importante liu maka rekusu umanu

Diretór Interinu afirma katak, Sistema Ofísiu ne’e fó ona solusaun ba servisu IDN nian tanba feramenta sira ne’ebé iha atu rejolve problema ne’ebé akontese iha administrasaun públika.

Xefi Ezekutivu Interinu ne’e mós agradese ba TIC TIMOR tanba apoiu ona IDN iha jestaun akadémika nian no sira nia parte sei utiliza sistema ida ne’e no sistema Ofísiu ida ne’e atu fasilita servisu. TIC TIMOR mós fornese  ona email ofisiál no funsionáriu sira obrigatoriu sei utiliza servisu ida ne’ebé maka TIC TIMOR fornese.

Entretantu Formasaun ne’e,  hala’o durante loron rua iha salaun IDN Palásiu Governu.

(MÉDIA TIC)