AJÉNSIA TIC TIMOR I.P. ATRIBUI SERTIFIKADU APRESIASAUN BA FORMANDU NA’IN 7 HOSI SAMES I.P.

Ajénsia Teknolojia Informasaun no Komunikasaun, sigla português (TIC) TIMOR I.P., liu hosi Divizaun Dezenvolvimentu Sistema Aplikasaun (DSA) atribui sertifikadu apresiasaun ba funsionáriu na’in 7 hosi Serviço Autónomo de Medicamento e Equipamento da Saúde (SAMES) ne’ebé tuir ona formasaun kona-ba jestaun utilizasaun sistema portal ne’ebé dezenvolve hosi TIC TIMOR I.P.

Iha serimónia enseramentu ba formasaun ne’e, Diretór Divizaun Dezenvolvimentu Sistema Aplikasaun (DSA) Justo Fernandes hatete, formasaun ida ne’e, nu’udar kompromisu ba kooperasaun ne’ebé iha ona. Hein katak formasaun ida ne’e, bainhira hotu hosi parte SAMES nian bele atualiza informasaun ba portal ne’e rasik.

Nia dehan, sidadaun hotu iha Timor-Leste presiza hatene informasaun sira ne’ebé relasiona ho atividade SAMES nian.

“Bainhira formasaun ida ne’e hotu parte TIC TIMOR sei fó asisténsia téknika no sei halo manutensaun ba iha sistema portal SAMES nian para sistema ne’e bele funsiona 24 oras, atu nune’e informasaun sira ne’e, ema bele asesu hosi rai laran nomós estranjeiru,” dehan nia.

Diretór ne’e informa, kooperasaun ida ne’e, sei kontinua bainhira iha aplikasaun ka sistema balun ne’ebé nesesáriu hahú hosi parte SAMES nian, hakarak dezenvolve, TIC TIMOR prontu kolabora ba planu sira ne’ebé iha.

Iha fatin hanesan, Diretór Ezekutivu SAMES I.P., Santa Martins, agradese ba TIC TIMOR maske iha limitasaun maibé karik, Ajénsia TIC TIMOR maka responde hotu ba nesesidade informátika ba liña ministerial inklui SAMES, tanba ida ne’e bazeia ba polítika Governu nian kona-ba Governasaun Eletrónika nune’e ida ne’e hanesan parte ida hosi prosesu ba Governu Eletróniku.

“Website ne’e, hanesan dalan ida atu kanaliza informasaun sira kona-ba atividade SAMES nian   liu hosi ida ne’e atu nune’e sidadaun sira bele asesu,” dehan nia.  #MÉDIA TIC#