Ajénsia TIC TIMOR I.P hahu halo teste final ba koneksaun rede Fibra Ótika Terestre iha Munisípiu 12 antes halo lansamentu

 MANATUTU, 28 MARSU 2019

Ekipa tékniku husi Ajénsia Tecnologia da Informação e Comunicação (TIC) TIMOR I.P hahú hala'o teste ba koneksaun rede Fibra Ótika terestre iha munisípiu Manatutu no Lautem.

Objetivu husi ida ne'e, atu halo teste ba koneksaun rede Fibra Ótika ne'ebé antes ne'e ekipa tékniku husi Timor Telecom instala ona. Iha prosesu teste ne rasik, ekipa tékniku mós entrega manual ba Administradór Munisípiu sira kona-ba oinsá atu asesu ba aplikasaun baseia ba web ho naran “ViCall” ou Video Call. Tuir planu iha futuru, Primeiru Ministru no Governantes sira se halo Video Conference ho Administradór Munisípiu sira diretamente liu husi fasilidade Fibra Ótika terestre refere. Ekipa tékniku mós halo teste ba aplikasaun Freebalance husi munisípiu ba iha Ministériu Finansas liuhosi fasilidade Fibra Ótika ne’e mós.

Iha okaziaun ne'e, Diretór Infraestrutura Ajénsia TIC Timor I.P André Marques esplika katak, liu husi koneksaun rede Fibra ótika terestre bele fó vantajen boot ba governu hodi hala'o servisu administrativu tanba iha koneksaun ne'ebé lais.

Iha teste ne'e Administradór munisípiu Manatutu Fernando Domingos de Sousa informa, nia sente orgullu ho koneksaun fibra ótika tanba antes ne'e susar tebes atu asesu ba liña internet liuliu ba sistema Freebalance tanba ne'e ho instalasaun ida ne'e bele ajuda sira hodi hala'o servisu administrativu di’ak liu tan.

" Ami sente liuhosi koneksaun Fibra Ótika terestre ida ne'e ami bele asesu ba ami nia servisu administrativu, tanba durante ne'e liña internét ne'ebé ami asesu todan tebes, tanba ne'e ami espera katak , koneksaun ida ne'e bele fó benefísiu ne'ebé di'ak," informa Administradór.

Alende ne'e ekipa tékniku mós kontinua ba iha Munisípiu Lautem hodi halo teste final ba koneksaun Fibra Otika husi Munisípiu Lautem ba Díli no mós ba munisípiu sira seluk. Administradór Munisípiu Lautem Zeferino dos Santos Sequeira dehan, koneksaun rede Fibra ótika terestre sei fó vantajen ne'ebé boot ba sira.

" Ami sente kontente tebes ho koneksaun Fibra Ótika tanba bele fó benefísiu ne'ebé di'ak .Durante ne'e ami susar tebes hodi asesu ba internét hodi halo servisu tanba bainhira ami nia funsionáriu sira atu halo sistema FreeBalance tenke ba Díli ba iha Ministériu Finansas hodi asesu ba sistema FreeBalance tanba ne'e ho instalasaun Fibra Ótika ami bele halo servisu di'ak liu tan