AJÉNSIA TIC TIMOR I.P NO SAMES I.P ASINA MEMORANDU ENTENDIMENTU BA ÁREA LIMA

Ajénsia Tecnologia da Informação e Comunicação (TIC) TIMOR I.P, no Serviço Autónomo de Mediacamentos e Equipamentos de Saúde (SAMES) asina Memorandu Entendimentu ba kooperasaun servisu iha área lima, sistema informasaun nian. Akordu servisu ne’ebé asina, sei haree ba komponente lima tuir Nota Entendimentu ne’ebé konkorda maka haree kona-ba, SAMES nia website ho enderesu (SAMES.GOV.TL), daruak maka haree kona-ba SAMES nia sistema website médiku nian (EDMS.SAMES.GOV.TL), iha pontu datoluk maka kona-ba sistema Email ofisial SAMES nian ho nia hospenagem @sames.gov.tl, dahaat kona-ba planu solusaun téknika ba konetividade lokál no ikus liu maka hosting aplikasaun SAMES nian no kontinua dezenvolve aplikasaun ne’ebé SAMES presiza iha futuru ba sira nia servisu. Diretór Ezekutivu TIC TIMOR I.P, Roberto Caitano de Sousa Vicente iha nia entrevista hatete, TIC TIMOR harii kedas VI Governu konstitusionál iha tinan 2017 hahú husi ne’ebá, mai ho hanoin ida atu hamosu inisiativa Governu ne’ebé maka eletróniku liu no iha âmbitu ida ne’e, hahú kedas servisu efetivamente la’o iha 2018 to’o agora TIC TIMOR iha kooperasaun ho instituisaun estadu tomak kuaze 49 maka uza ona servisu sira ne’ebé TIC TIMOR iha, hanesan konetividade internet, dezenvolvimentu aplikasaun, treinamentu no seluk tan. Iha fatin hanesan, Diretór Ezekutivu SAMES I.P, Santana Martins hatete, sira nia parte sente orgullu tanba bele realiza aktu istóriku ida ho TIC TIMOR oinsá maka atu bele iha prosesu melloramentu instituisaun estadu nian liu husi estabelesimentu akordu kooperasaun entre TIC TIMOR I.P ho SAMES I.P. Objetivu husi akordu ida ne’e, maka atu asegura implementasaun Governu-Eletróniku no iha sistema regulasaun uniforme ida ba iha sistema eletróniku instituisaun sira iha estadu nia laran. “Sente haksolok tanba TIC TIMOR prontu atu bele fó apoiu no akompaña servisu SAMES nian ne’ebé maka la’ós foin atu hahú maibé hakarak opsimiza de’it servisu ida ne’e tanba servisu kuaze la’o tinan rua ona,” Diretór afirma. Entretantu Nota Entendimentu ne’e asina husi Diretór Ezekutivu TIC TIMOR, Roberto Caitano de Sousa Vicente no Diretór Ezekutivu SAMES I.P, Santana Martins. Iha biban ne’e asina mós akordu nivel servisu ne’ebé asina husi Diretór Sistema Aplikasaun TIC TIMOR I.P, Justo Fernandes no Diretór Ezekutivu SAMES I.P. #MÉDIA TIC#