AJÉNSIA TIC TIMOR I.P SEI FASILITA REDE KOMUNIKASAUN BA RTTL E.P

Diretór Ezekutivu Ajénsia Tecnologia da Informação e Comunicação (TIC) TIMOR I.P Roberto Caetano de Sousa Vicente hamutuk ho ekipa Tékniku Ajénsia nian, halo aprezentasaun kona-ba ezisténsia Ajénsia TIC TIMOR I.P nian nomós fahe informasaun sira kona-ba servisu ne’ebé  instituisaun ne’e halo no planu  servisu ne’ebé sei halo ba ekipa  Rádiu Televizaun Timor-Leste  (RTTL E.P).
 Objetivu prinsipál husi sorumutu ne’e, atu haree oinsá RTTL E.P bele aproveita infraestrutura ne’ebé governu investe liu husi TIC TIMOR I.P hodi hasa’e liu tan kualidade no prestasaun servisu RTTL nian iha futuru la’ós iha Dili de’it, maibé mós iha territóriu tomak.
Xefe  Ezekutivu TIC TIMOR I.P esplika, Ajénsia ne’e harii bazeia ba dekretu lei númeru 29/ 2017 nia papél importante maka, atu haree kona-ba  polítika Instituisaun ne’e nian   no  sai  hanesan Ajénsia ne’ebé implementa governu eletróniku iha territóriu tomak hanesan liña ministerial, Ajénsia Autónomu sira ne’ebé hetan finansiamentu husi Orsamentu Jerál Estadu (OJE).
Nia dehan, Programa balun la’o ona hanesan, inaugurasaun infraestrutura báziku ba Fibra Ótika Terrestre (FOT) nian   ne’ebé liga ona ba iha munisípiu 12 no sira iha ona koneksaun direta mai iha sentru dadus Ajénsia nian iha Dili. Konteúdu lokál, bele asesu ba infraestrutura ne’ebé TIC TIMOR I.P iha no rai iha sentru dadus, iha palácio Governo.
 Website no aplikasaun sira ne’ebé maka dezenvolve ona hanesan Freebalance, Dalan ba Futuru (DBFT) no website ba liña ministerial sira oras ne’e dadauk  rai iha sentru de dadus TIC TIMOR I.P. Importante liu maka oinsá bele utiliza rede ne’ebé 100% governu nian hodi hasa’e sira nia kualidade servisu iha nivel munisípiu nian.
“Tanba ita sempre dehan, problema prinsipál ne’e iha komunikasaun husi munisípiu mai iha Dili, tanba ne’e, liu husi infraestrutura ne’ebé ita iha, bele fó solusaun balun la’ós hotu maibé bele dehan autoridade sira iha ona dalan atu halo komunikasaun mai iha nasionál,” esplika nia.
Nia afirma katak, iha pontu barak ne’ebé diskute maibé, ekipa sei mai enkontru nivel tékniku ho RTTL E.P atu define loloos nesesidade RTTL E.P nian no hafoin avaliasaun sira ne’e, liu-liu ba assessment sira ne’ebé sei halo maka foin hamosu solusaun sira ne’ebé TIC TIMOR I.P bele oferese ba RTTL. Maibé objetivu prinsipál oinsá maka bele kobre munisípiu sira nomós iha rai liur bele asesu lalais.
Iha fatin hanesan Presidente RTTL E.P Francisco da Silva Gari hateten, iha posibilidade oinsá bele koopera, atu  haree servisu entre RTTL E.P no TIC TIMOR I.P  iha futuru tanba RTTL oras ne’e dadauk halo servisu iha munisípiu no presiza atu manda lalais notísia sira husi munisípiu mai Dili atu halo publikasaun susar tanba velosidade internet ne’ebé iha, dala ruma la’o di’ak no dala ruma mós la’o ladún di’ak.
Tanba ne’e, iha oportunidade di’ak, karik TIC TIMOR I.P iha posibilidade balun ne’ebé bele apoiu ba RTTL E.P atu bele fornese informasaun ba komunidade sira iha munisípiu nune’e sira bele akompaña di’ak no lais liu ba ezekusaun governu nian nomós atividade estadu nian iha TL, atu nune’e komunidade sira bele asesu lalais atividade iha rai laran.
Tanba ne’e, ekipa RTTL mós sei tur hamutuk atu ko’alia, karik iha posibilidade bele koopera hodi fornese informasaun ba komunidade sira.
Entretantu nia informa, Liu husi servisu ida ne’e, tuir sira nia haree, iha poténsia boot tebes atu haree hamutuk iha futuru karik servisu ne’e di’ak liu tan no presiza haree iha meius legal balun ne’ebé halo hodi asegura servisu.#Média TIC#