AJÉNSIA TIC TIMOR I.P., SIMU VIZITA KORTEZIA HOSI ENKAREGADU NEGÓSIU EMBAIXADA EUA

Enkaregadu Negósiu Embaixada Estadu Unidos Amérika (EUA) Sr. Tom Daley hamutuk ho Diretora United States Agency International Development (USAID) Sra. Zema Semunegus ho nia ekipa, hala’o vizita kortejia ho Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente ho nia ekipa, iha sala enkontru TIC TIMOR I.P Palásiu Governu.

Objetivu hosi vizita ne’e, hakarak atu hatene liu tan kona-ba ejisténsia Ajénsia TIC TIMOR nian inklui progresu servisu ne’ebé TIC TIMOR hala’o ona.

Iha sorumutu ne’e, Diretór Ezekutivu agradese ba ekipa hosi Estadu Unidos Amérika ne’ebé vizita ona TIC TIMOR hodi rona no hatene liu tan kona-ba TIC TIMOR.

Iha vizita kortejia ne’e, Xefe Ezekutivu halo introdusaun kona-ba papél TIC TIMOR I.P. nian no atualiza lala’ok servisu TIC TIMOR nian tuir misaun no vizaun ne’ebé iha bazeia ba dekretu lei númeru 29/2017 inklui progresu servisu ne’ebé TIC TIMOR atinje ona.

Alende ne’e, aprezenta mós Planu estratéjiku Timor Dijitál 2032 ne’ebé ho objetivu hakarak Governu Timor-Leste ne’ebé simples liu, fasil no besik liu ba povu tuir polítika Governu nian.

Iha biban ne’e, ekipa Diresaun Identidade Úniku mós halo aprezentasaun kona-ba programa ID Úniku no progresu servisu ne’ebé oras ne’e dadauk la’o hela.

Iha fatin hanesan, Enkaregadu Negósiu Embaixada EUA Sr. Tom Daley mós agradese ba TIC TIMOR liu-liu ba lideransa Diretór Ezekutivu nian ne’ebé hala’o servisu di’ak tebes iha área ICT nian.

Hafoin enkontru, ekipa hosi EUA mós hala’o vizita ba Diresaun sira ne’ebé tutela iha Ajénsia TIC TIMOR hodi haree diretamente Diresaun sira nia servisu.

Entretantu enkontru refere, Partisipa hosi Diretór Diresaun Dezenvolvimentu Sistema Aplikasaun (DSA) Sr. Justo Fernandes, Diretór Diresaun Infraestrutura Sr. André Felix Marques, Diretora Diresaun Planeamentu no Finansas Sra. Maria da Frosa H. Marques, Diretór Servisu Korporativu, Sr. Juvenal Soares do Carmo Lay nomós ekipa hosi Diresaun Identidade Úniku. #MÉDIA TIC#