BTL HUSU TIC TIMOR I.P ATU FÓ APOIU IHA ÁREA INFORMÁTIKA

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, ho nia ekipa hala’o enkontru ho Prezidente Bee Timor-Leste (BTL), Carlos Peloi, iha nia edifísiu Caicoli.
 
Objetivu husi sorumutu ne’e, atu hatene planu ne’ebé BTL iha, nomós identifika saida maka Ajénsia bele fó apoiu liu husi servisu ne’ebé BTL sei halo no karik bele identifika mós nesesidade saida maka bele koopera ho TIC TIMOR.
 
Tanba Ajénsia TIC TIMOR estabelese bazeia ba dekretu lei númeru 29/2017 ho nia knar prinsipál atu jere kestaun ne’ebé liga ba informátika iha Governu tomak hanesan sistema, infraestrutura nomós aplikasaun tomak iha âmbitu Governu eletróniku no BTL mós sei halai ba iha refere tanba halo prestasaun servisu ba públiku ho nune’e, iha parte balun karik presiza TIC TIMOR nia apoiu iha sistema informátika ne’ebé BTL sei presiza iha futuru.
 
Ho ida ne’e, parte BTL informa katak, Instituisaun refere nu’udar instituisaun foun tanba ne’e, oinsá servisu hamutuk iha sistema informasaun ba oin atu jestaun di’ak, presiza sistema ne’ebé iha ona nune’e bele gia servisu ne’ebé iha ho transparénsia.
 
Sira mós planu atu kria baze de dadus ba sistema bee moos iha Timor-Leste nune’e bele hatene implementasaun projetu iha ne’ebé, kapasidade fornesimentu bee, ema na’in hira maka asesu ba bee moos inklui nia funsionamentu la’o oinsá.
 
Nune’e, sira nia parte husu ba TIC TIMOR atu fó apoiu hodi kria software kona-ba jestaun finanseiru, sistema base de dadus bee moos nian, liña internet, email ofisial nomós website hodi fasilita servisu BTL nian.
 
Entretantu iha tempu badak, ekipa tékniku TIC TIMOR sei halo assessment ba infraestrutura ne’ebé eziste iha BTTL. #MÉDIA TIC#