DIRETÓR EZEKUTIVU AJÉNSIA TIC TIMOR SAI ORADOR IHA SEMINÁRIU KONA-BA ESPASU DIJITÁL HODI PROMOVE DIREITUS UMANUS

Dili, 06 Dezembru 2023- Diretór Ezekutivu Ajénsia TIC TIMOR I.P., Sr. Venâncio Pinto S.Kom sai oradór iha semináriu nasionál kona-ba espasu dijitál hodi promove direitus umanus  ne’ebé raliza hosi Provedoria Direitus Umanus no Justisa (PDHJ) no Universidade Nasionál Timor Lorosa’e (UNTL ).

Iha semináriu ne’e, Diretór ezekutivu TIC TIMOR I.P., aprezenta kona-ba papél importante Ajénsia TIC TIMOR nian maka hanesan, Public Services no Private Services bazeia ba programa IX Governu Konstitusionál nian iha programa 2.8 kona-ba Teknolojia Informasaun no Komunikasaun nomós programa 6.7 kona-ba Governu Eletróniku.

Xefe Ezekutivu esplika katak, iha seklu 20 ko’alia kona-ba teknolojia maka kabe ba dijitalizasaun no iha pontu rua ne’ebé labele hases maka dijitalizasaun ofline no online. Dijitalizasaun ne’e kabe ba área hotu hanesan, Sáude, Edukasaun, Agrikultura no Administrasaun públika.

Lider másimu TIC TIMOR ne’e informa katak, bainhira ko’alia kona-ba dizitalijasaun maibé laiha lei sei la garantia sidadaun  nia  dadus privasidade.

“TIC TIMOR nian papél ba iha tinan 2024 sei kria public services hanesan portal úniku ne’ebé atu halo atendementu públiku ba BI, Pasaporte, karta kondusaun no seluk tan,” esplika Diretór Ezekutivu.  

Diretór ne’e mós realsa tan katak, iha tempu badak TIC TIMOR sei halo akordu ho Google, Youtube nomós Facebook atu bele fó espasu ba youtuber sira atu rejistu.

TIC TIMOR mós iha nia papél, oinsá atu garante informasaun ne’ebé edukadu, kualidade nomós grantia katak informasaun ne’e loos.

Diretór Ezekutivu esplika liu tan katak, agora dadauk TIC TIMOR ho Diresaun Nasionál Infraestrtutura no Komunikasaun (DNIK) servisu hamutuk. Parte DNIK haree kona-ba liña konetividade hosi nasionál to’o iha suku no TIC TIMOR haree liu ba ninia konetividade interligasaun atu nune’e bele asegura Governu eletróniku ne’ebé atu impelementa iha tinan 2024 sai nu’udar balkaun úniku.

TIC TIMOR hola parte iha grupu traballu tékniku ba projetu Kabu Submariñu ne’ebé sei hahú iha 2024 no hosi ida ne’e internet baratu ona.

TIC TIMOR mós kria ona Diresaun foun rua ne’ebé   hanaran Diresaun Cyber Security nomós Diresaun Data Center  ne’ebé ho  objetivu atu proteje dadus estadu nian ne’ebé sentraliza iha sentru dadus Governu eletróniku ne’ebé jere hosi TIC TIMOR.

Iha fatin hanesan Provedora Adjuntu ba Direitos Umanus Sra. Maria Marilia X.C.O da Costa hatete, semináriu ne’e hala’o atu komemora loron mundiál Direitus Umanus hodi haree ba privasidade, ameasa no ataka online sira ne’ebé direta ba dignidade umanu.

Hein katak informasaun ne’ebé siadaun sira hetan liu hosi spasu dijitál bele fó benefísiu ba sira nia aan, estudu, servisu no komunidade.

Entretantu semináriu ne’e, loke hosi Provedora Adjuntu ba Direitos Umanus Sra. Maria Marilia X.C.O da Costa no partisipa mós hosi orador sira seluk inklui Sekretaria Ezekutiva Sra. Cesaltina da Silva Andrade Araujo nomos estudante universitáriu sira hosi UNTL, UNDIL no seluk tan.

(MÉDIA TIC)