DIRETÓR EZEKUTIVU TIC TIMOR HETAN ENTREVISTA HUSI MÉDIA GMN TV HODI KO’ALIA KONA-BA TIC TIMOR NIA ESFORSU BA KOMBATE HOAX

Jornalista:  Relasiona ho situasaun COVID-19 ema hahú lansa informasaun barak loos no balun koko atu halo komunidade la fiar informasaun ne’ebé Governu fó sai ona no SECOMS rasik mós kria ona grupu hodi halo kombate ba hoax ne’ebé inklui mós TIC TIMOR no oinsá esforsu TIC TIMOR nian hodi apoiu SECOMS ba kombate hoax?
 
Diretór Ezekutivu : “Luta ida ne’e, luta ne’ebé maka la’ós Timor-Leste de’it maka enfrenta maibé nasaun barak haree hanesan ameasa boot ida, liu-liu ba tempu ida hanesan agora, durante COVID-19 tanba ema ne’ebé maka espalla informasaun falsu nomós aproveita momentu ne’ebé pas hodi espalla informasaun falsu ho objetivu hanesan dala barak kria de’it hodi halo ema pániku iha sosiedade entaun espesífikamente iha COVID-19 tanba ita haree iha tinan kotuk ita haree situasaun ne’ebé maka difisil tebes liu-liu liga ba fontes de informasaun ita nia sosiedade  iha difikuldade atu hatene fontes informasaun loloos kona-ba COVID-19 ne’e mai husi ne’ebé tanba ema hotu-hotu lansa informasaun,”
 
Jornalista:  Karik iha solusaun seluk ne’ebé iha hodi kombate hoax liu-liu hanesan buka tuir ema sira ne’ebé espalla informasaun falsu?
 
Diretór Ezekutivu :  “Ita hahú dezenvolve portal ne’ebé maka espesífikamente, haree ba asuntu COVID-19 iha Timor-Leste, entaun ita dezenvolve  portal ho naran covid19.gov.tl, ne’ebé maka iha ligasaun direta ho Ministériu Saúde (MS), hato’o informasaun tomak liga ba iha COVID-19 entaun ida ne’e, ho neineik  prienxe espasu públiku ho informasaun ne’ebé maka ita bele fiar mai husi fontes ne’ebé kredivel katak, mai husi instituisaun ne’ebé maka iha autoridade atu hato’o informasaun hanesan husi MS sira maka, iha autoridade atu hato’o informasaun loloos ligadu ba iha COVID-19.  TIC TIMOR foti dadus husi ne’ebá, atualiza iha website ne’ebé maka iha diariamente bainhira iha kazu foun ka laiha kazu foun publika nafatin informasaun hodi sosiedade bem informado,” #MÉDIA TIC#