DITETÓR EZEKUTIVU INTERINU AJÉNSIA TIC TIMOR I.P. PARTISIPA IHA SOSIALIZASAUN PROGRAMA ID ÚNIKU BA UNITAL

Diretór Ezekutivu Interinu Ajénsia Teknolojia Informasaun no Komunikasaun sigla português (TIC) TIMOR I.P., Sr Justo Fernandes, partisipa iha serimónia sosializasaun programa ID Úniku ba Dosente, Funsionáriu no Estudante sira hosi Universidade Orientál Timor- Lorosa’e (UNITAL) iha Kampus UNITAL Bekora.  

Objetivu hosi sosializasaun ne’e, atu bele kolabora hamutuk hodi partilla informasaun sira hotu kona-ba programa ID ÚNIKU to’o iha Komunidade sira iha territóriu Timor laran tomak.

Iha  Diretór abertura ba soializsaun ne'e, Ezekutivu Interinu hatete, TIC TIMOR mós kompriende papél UINITAL nian iha Timor-Leste, hodi hasa’e no prodúz rekursu umanu hodi sai mákina ba Estadu. Tanba ne’e, Identidade Úniku hanesan mós liu hosi dalan Universidade ne’e bele habelar koñesimentu kle’an no di’ak liu tan ba iha sidadaun no komunidade sira hotu iha rai laran.

Liu hosi sosializasaun ida ne’e, Dosente no universitáriu sira bele iha ona informasaun kona-ba Saida maka ID Úniku? ; Tanba sá Presiza ID Úniku?; Benefísiu Saida hosi ID Úniku?; no Impaktu saida de’it maka sei fó hosi ID Úniku ida ne’e ba Timor Leste? Ho ida ne’e, marka tan pasu foun ida iha esforsu atu alkansa Programa VIII Governu ba Boa Governasaun iha área Governu Eletróniku no Reforma Administrasaun Publika.

Iha fatin hanesan Vise-Reitór II, Sr. Armindo do Seo Fátima hatete, programa ID Úniku ne’e hanesan programa Governu nian ne’ebé importante atu habelar ba komunidade sira hodi hatene.

Ho nune’e nia parte husu ba Dosente no Estudante sira atu koopera hodi ajuda polítika Governu nian ne’ebé akontese iha Timor-Leste.  nu’udar akadémiku ajuda Governu hodi hatutan no hakle’an informasaun Governu fahe ba akadémiku sira liu hosi programa ID Úniku.

Alende ne’e, Diretór Diresaun Identidade Úniku Sr. Florindo Guterres da Costa mós halo aprezentasaun kona-ba jornada Implementasaun Programa Identidade úniku. Iha biban ne’e, ekipa komunikasaun ID Úniku mós aprezenta matéria sosializasaun programa ID nomós sesaun husu no hatán.

Entretantu serimónia sosializasaun ne’e, organiza hosi Diresaun ID Úniku Ajénsia TIC TIMOR abertura hosi Vise-Reitór II Sr. Armindo do Seo Fátima. #MÉDIA#TIC