EKIPA AJÉNSIA TIC TIMOR I.P HALA’O ENKONTRU PRELEMINÁRIU HO EKIPA TÉKNIKU MSSI HODI APREZENTA KONA-BA SERVISU

Diretór Ezekutivu Ajénsia Tecnologia da Informação e Comunicação (TIC) TIMOR I.P Roberto Caetano de Sousa Vicente ho ekipa infraestrutura Ajénsia nian, hala’o enkontru prelemináriu ho ekipa tékniku Ministériu Solidariedade Sosiál no Inkluzaun (MSSI).

Objetivu husi sorumutu ne’e, hodi aprezenta kona-ba servisu nivel tékniku ne’ebé Ajénsia halo ona no ba oin sei iha tan enkontru hodi hetan apoiu polítikamente ba inisiativa ne’ebé Instituisaun ne’e halo dadauk tuir atribuisaun lei númeru 29/2017. Antes ne’e, hala’o ona enkontru ho liña  Ministériu barak ne’ebé hato’o pedidu atu halo aprezentasaun kona-ba servisu TIC TIMOR I.P nian ne’ebé la’o dadauk no planu ba oin nian.

Xefe Ezekutivu informa katak, ida ne’e inisiativa ne’ebé VIII governu kompromete ona liu husi Primeiru Ministru, iha programa governu nian kona-ba governu eletróniku. Ho objetivu ida ne’e maka oinsá buka dalan atu hodi governu hakbesik ba povu no mekanizmu sistema governasaun sai Sistema úniku. Iha aspetu infraestrutura no aplikasaun ne’ebé iha ligasaun ba TIC TIMOR I.P, tenta atu sentraliza iha âmbitu governu eletróniku. Ajénsia ne’e tutela ba Gabinete Primeiru Ministru no hetan nomeasaun ba kargu sira hanesan Diretór Ezekutivu ho nia membru Konsellu Administrativu sira ho mandatu tinan 5 no bele ekstende ba períodu 2.

Projetu dahuluk ba Fibra Ótika Terrestre, kompleta ona iha Munisípiu 12 ne’ebé iha ona koneksaun diretamente mai iha TIC TIMOR I.P. Preparasaun ba tinan 2020 tuir orientasaun PM nian katak, hahú ho projetu kabu sub mariñu no Iha ona infraestrutura ne’ebé atu fó konetividade ba iha Munisípiu 13 hodi asesu ba aplikasaun lubuk ida ne’ebé agora dadauk hahú dezenvolve ona. Iha mós planu estratéjiku instituisaun ida ne’e nian to’o 2030 no hein aprovasaun husi Primeiru Ministru.

Iha biban ne’e Diretór Infraestrutura André Marques aprezenta, Rede FOT fahe ba Zona tolu, Zona dahuluk kompostu husi Dili, Aileu, Liquiça, Ermera no Mananuto, Zona daruak kobre iha Baucau, Lautem, Viqueque no Zona datoluk inklui Cova-Lima, Manufahi, Ainaro no Bobonaro. Vantajen husi rede ne’e atu hamenus dependénsia ba operadór sira ne’ebé eziste no redús kustu ba asesu konteúdu lokál sira hanesan, Sistema Freebalance, Dalan ba Futuru, no oferese mós email sytem, Video Conference inklui Voice Over.

Instituisaun governu ne’ebé hosting ona iha TIC TIMOR I.P maka hanesan, CNC, MRLAP, AIFAESA, GPM, no single portal mós sei hosting hotu iha ne’ebá. Ministériu sira ne’ebé ligadu ona maka hanesan MS, MNEK, PCM, MRLAP no SECOMS. Ministériu ne’ebé halo ona pedidu ligasaun ba Rede FOT maka hanesan PNDS, MAE, SEPFOPE, SEJD, PNTL.

Ho nune’e Xefe Unidade IT MSSI David Araújo da Costa mós aprezenta, servisu ne’ebé durante sira halo ona no husu atu tinan ida ne’e bele estabelese konetividade rede refere ba MSSI hodi fasilita servisu Ministériu nian. Nia mós husu, karik TIC TIMOR I.P bele fasilita tékniku husi Ministériu refere hodi kapasita formasaun nune’e, bele halo atendementu servisu MSSI nian.

Entretantu Asesór dos Asuntos Verificação e Acontabilidade Domingos Belo Ximenes hateten,   nia parte sei hato’o ba Ministra atu haree, tanba ministériu rasik prevee ona orsamentu ba área teknolojia maibé ho prezensa Ajénsia ida ne’e nian  bele halo diskusaun ne’ebé kle’an liu tan hodi redús orsamentu ba ida ne’e.  #Média TIC#