EKIPA KTE KONTINUA HALA’O ENKONTRU REGULAR KADA SEMANA

Ekipa Komisaun Téknika Eventual (KTE) ne’ebé lidera husi Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente hala’o enkontru regular  KTE nian ba dala-hitu iha Salaun Diresaun Nasional Rejistu Notariadu (DNRN).

Iha sorumutu ne'e, ekipa tékniku husi KTE halo aprezentasaun kona-ba solusaun téknika ba implementasaun sistema Identifikador Úniku (Unique ID) nian nomós resultadu analiza pontus forte, fraku, oportunidade no ameasa sira (SWOT Analysis) ba kada solusaun ne’ebé ekipa apresenta.

KTE mós kontinua diskute kona-ba asuntu estratéjiku sira ne’ebé iha relasaun ho implementasaun sistema Identifikador Úniku inklui asuntu legal no instituisional, planu operasional no orsamentu.

Iha biban ne’e, rona mós aprezentasaun kona-ba esperiénsia nasaun Cabo Verde nian ba prosesu implementasaun sistema Identifikador Úniku ne’ebé aprezenta husi, Diretór Jeral das Telecomunicações e Economia Digital (DGTED), Ministeriu Financas Cabo Verde, Sr. Aruna Handem via video conferencia.

Entretantu, membru ne’ebé partisipa  iha enkontru ne’e, maka TIC TIMOR,  Presidênsia do Conselho de Ministros(PCM) , Ministériu Edukasaun (ME) , Komisaun Funsaun Públika (KFP), Ministériu Interior (MI) , Ministériu Justisa (MJ), Ministériu Finansas (MF) no UNICEF.  #MÉDIA TIC#