EKIPA TIC TIMOR HALA’O ENKONTRU PRELEMENÁRIU HO EKIPA HUSI KAK

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, hamutuk ho ekipa hala’o enkontru prelemináriu Komisáriu Adjuntu ba Servisu Apoiu Kooperasaun, Komisaun Anti Korrupsaun (KAK), Alexandre Faustino Freitas ho nia ekipa hodi ko’alia kona-ba oinsá TIC TIMOR bele haree maneira atu bele fó apoiu ba instituisaun ida ne’e liu-liu ba asuntu ne’ebé KAK presiza relasiona ho sistema informátika.
 
Iha enkontru ne’e mós  diskute kona-ba, asuntu ne’ebé iha dependénsia ba servisu KAK liga ba Lei Medidas Prevensaun Kombate Korrupsaun ne’ebé iha artigu ida ko’alia kona-ba deklarasaun rikusoin liu husi plataforma online tanba bazeia ba orientasaun Primeiru-Ministru Taur Matan Ruak katak, TIC TIMOR maka atu fó apoiu ba dezenvolvimentu plataforma refere.
 
Alende ne’e, Xefe Ezekutivu esplika kona-ba ezisténsia TIC TIMOR nian ne’ebé bazeia ba dekretu lei númeru 29/2017 ho nia papél atu sentraliza dadus Governu nian iha âmbitu Governu Eletróniku.
 
iha biban ne’e, esplika mós kona-ba servisu ne’ebé Ajénsia atinje ona, progresu servisu ne’ebé oras ne’e la’o dadauk inklui planu servisu ne’ebé halo iha futuru.
 
Ho nune’e Komisáriu Adjuntu ba Servisu Apoiu Kooperasaun ne’e hatete, KAK iha difikuldade lubuk ida hanesan, difikuldade atu hetan informasaun tanba seidauk sentraliza informasaun no susar atu asesu ba liña internet tanba ne’e, ba oin bele haree hamutuk hodi halo assessment. Sira mós presiza Email ofisial tanba durante laiha email ofisial hodi utiliza ba asuntu servisu nian.
 
Nia mós informa katak, ekipa ida estabelese ona kona-ba, Medidas Prevensaun Kombate Korrupsaun inklui estabelese ona sekretariadu no semana oin sei hala’o fali enkontru atu bele haree lei ne’e, ho didi’ak hodi identifika hotu saida maka atu dezenvolve.
 
Sira mós sei halo aprezentasaun iha semana rua ka tolu mai no presiza mós enkontru ho Tribunal Rekursu (TR) nune’e dezenvolve sistema ida de’it atu bele asegura ninia seguransa tanba deklarasaun ne’e liga ba krime korrupsaun nian.   #MÉDIA TIC#