EKIPA TIC TIMOR HAMUTUK HO AJÉNSIA AUTÓNOMU SIRA SELUK HALO APREZENTASAUN PROGRAMA OJE 2021 BA PM

 
Ekipa Ajénsia Tecnologia da Informação e Comunicação (TIC) TIMOR I.P, hamutuk ho Ajénsia Autónomu sira seluk ne’ebé tutela ba Gabinete Primeiru Ministru nian,  halo aprezentasaun programa Orsamentu Jerál Estadu (OJE) tinan  2021 ba S.E. Primeiru Ministru Taur Matan Ruak molok lori ba Parlamentu Nasional (PN).
 
 
Iha sorumutu ne’e, S.E. Primeiru Ministru orienta Ajénsia Autónomu hotu-hotu inklui Sekretaria Estadu Igualdade no Inkluzaun (SEII) katak, diskusaun iha PN ba tinan oin sei foka liu ba orsamentu san bazeia ba programa tanba ne’e orsamentu sei ba iha programa maka barak liu ho ida ne’e maka tenke konsentra barak liu iha programa.
 
 
Iha entrevista ho jornalista sira, Diretór Ezekutivu TIC TIMOR I.P, Roberto Caitano de Sousa Vicente hatete, programa prioridade TIC TIMOR nian ba tinan 2021 foka liu ba dezenvolvimentu dijitál Governu Eletrôniku tanba ne’e, ba tinan oin fokus liu ba aplikasaun nune’e bele apoiu liu tan instituisaun estadu sira hodi dezenvolve aplikasaun sira ne’ebé maka sira presiza hodi tulun liu tan sira nia servisu no sira mós bele fornese servisu di’ak liu tan ba sidadaun sira.
 
 
Nia dehan,  programa prinsipál tolu ne’ebé TIC TIMOR sei halo iha tinan oin ida maka, kontinuasaun dezenvolvimentu ba Fixa Família tanba durante estadu emerjénsia Governu iha problema barak atu ajuda subsídiu ba sidadaun sira, tanba laiha dadus sentru ba sidadaun sira, ho ida ne’e, hamosu fallansu tanba sistema la online  nune’e liu husi kooperasaun ne’ebé TIC TIMOR iha ho Ministériu Administrasaun Estatál (MAE) hodi dezenvolve plataforma dijitál ida ba Fixa Família bainhira asina ona nota entendimentu iha tinan oin bele hahú introdús ona.
 
 
Programa segundu maka kona-ba, Medidas Prevensaun Korupsaun ho ida ne’e, papál TIC TIMOR nian iha tinan oin atu dezenvolve plataforma online ba entidade sira tuir lei, atu bele halo deklarasaun liu husi sistema online.
 
 
Nia esplika, ikus liu programa prinsipál ida maka, programa implementasaun Identifikadór Úniku (Unique ID) kada sidadaun ida hahú husi moris to’o mate sira iha sistema Identifikadór Úniku ida de’it atu kuantifika sira ne’e se.
 
 
“Proposta orsamentu 2021 iha inísiu husu $ 7 milhoens resin maibé iha diskusaun naruk ho Ministériu Finansas hetan de’it aprovasaun ho montante $ 4 milhoens,” tenik nia.  #MÉDIA TIC#