KONTROLA IDENTIDADE DUPLA, TIC TIMOR I.P. HAHÚ HALO SOSIALIZASAUN BA PROGRAMA IMPLEMENTASAUN ID ÚNIKU

Relasiona ho problema prinsipál ne’ebé akontese iha Timor-Leste hanesan validade dadus difikulta Governu atu kuantifika ka kualitifika sidadaun sira liu hosi naran, ka ninia identifikasaun rasik tanba durante ne’e, Ministériu idak-idak iha sistema baze dadus ne’ebé hamriik mesak tanba ne’e, programa Identifikadór Úniku ne’ebé agora dadauk hahú, sei halo rejistrasaun hodi konsentra iha fatin ida atu nune’e Governu bele halo planeamentu hanesan asisténsia sosiál bele fasilita konkretamente.

Iha abertura ba sosializasaun program Identidade Úniku iha Munisípiu Likisá, Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente hatete, programa Identidade Úniku ne’e, atu kontribui ba Governu hodi halo servisu ne’ebé efisiénsia no efikásia liu hosi redusaun ba fraude sira liu hosi redusaun ba identidade dupla sira tanba sentraliza ona dadus iha fatin ida no bainhira sidadaun sira asesu ba sira nia dadus ita kuantifika no kualitifika ema ne’e nia duni ka lae.

Xefe Ezekutivu esplika, programa ne’e hahú dadauk ona loloos hahú iha tinan kotuk maibé tanba COVID-19 tanba ne’e, muda mai iha tinan ida ne’e hahú ho prosesu aprovizionamentu atu sosa ekipamentu sira ne’ebé maka sai baze atu uza ba programa Identifikadór Úniku ida ne’e.

“Sei fahe ba rejiaun karik bainhira rekruta ema barak entaun bele la’o dala ida maibé karik haree kestaun orsamentu ne’ebé maka labele mobiliza ema dala ida maibé karik kestaun orsamentu ne’ebé labele mobiliza ema dala ida entaun sei fahe fazeadamente maibé paralel,” esplika Xefe Ezekutivu.

 Sosializasaun kona-ba programa Governu nian liga ba Identidade Úniku no ida ne’e, hanesan parte ida hosi estratéjia komunikasaun TIC TIMOR nian partikularmente Diresaun Identidade Úniku, atu habelar koñesimentu kona-ba programa Identidade Úniku bainhira maka sei hahú? hahú hosi ne’ebé? Se maka hetan benefísiu? Ho nia orsamentu.

“Iha tempu hanesan fahe mós informasaun ba sidadaun sira atu nune’e sira bele hahú dezenvolve sira nia koñesimentu kona-ba programa ida ne’e to’o tempu bainhira iha prosesu rejistrasaun, sira sei partisipa iha prosesu ida ne’e, ativamente,” Diretór informa.  

Diretór ezekutivu mós husu ba populasaun sira atu bele entende didi’ak sosializasaun ne’ebé agora Governu halo iha âmbitu introdusaun ba programa ID Úniku ida ne’e tanba populasaun maka sei sai benefisiáriu hosi programa ida ne’e no hetan vantajen hosi programa ida ne’e.

 Iha fatin hanesan, Administradór Munisípiu Likisá Sr. Pedro Paulo Gomes agradese ba TIC TIMOR tanba bele sosializa ona program ID Úniku ida ne’e no husu ba autoridade no funsionáriu sira atu partisipa másimu durante sosializasaun ne’e la’o atu nune’e bainhira sosializasaun ne’e remata bele iha koñesimentu ruma.

Alende ne’e, Jestora Diresaun Identidade Úniku mós halo aprezentasaun kona-ba jornada implementasaun ID Úniku inklui aprezentasaun kona-ba matéria sosializasaun programa refere.

Sosializasaun ne’e, loke hosi Administradór Munisípiu Likisá Sr. Pedro Paulo Gomes no hetan partisipasaun másimu hosi Autoridade no funsionáriu sira hosi Munisípiu Likisá.

Entretantu atividade sosializasaun ne’e, kontinua iha Postu Administrativu Bazartete no Maubara.  #MÉDIATIC#