MINISTRA SAÚDE HATO’O PARABÉNS BA AJÉNSIA TIC TIMOR I.P IHA ANIVERSÁRIU BA DAHAAT

Ministra Saúde, Dra. Odete Maria Freitas Belo, lori Ministériu Saúde nia naran hato’o parabéns no votus susesu ba Ajénsia Tecnologia da Informação e Comunicação (TIC) TIMOR I.P, ne’ebé selebra nia aniversáriu ba dahaat nian. Ho selebrasaun aniversáriu ba dahaat ne’e, Ministra Saúde enkoraja nafatin TIC TIMOR atu forsa liu tan, hodi bele lori instituisaun hotu-hotu bele asesu ba informasaun sira no bele rai sira nia dadus ho kualidade no bele mós asegura dadus Governu nian. “Ho prezensa TIC TIMOR nian bele apoiu ona Ministériu Saúde hodi halo topolojia rede nian iha parte seluk aplika mós intranet iha instituisaun ne’e, hodi ajuda pesoál saúde sira hodi partilla informasaun ba malu liu-liu instituisaun boot hanesan MS di’ak atu bele pasa informasaun ba malu,” dehan Ministra. Entretantu Governante ne’e dehan, TIC TIMOR mós apoiu ona Ministériu liu husi rede lokál hodi asesu ba sistema sira finansas nian inklui dezenvolve website Ministériu nian hodi partilla sira nia informasaun no asegura mós dadus ministériu nian. #MÉDIA TIC#