MINISTRU FIDELIS MAGALHÃES HATO’O PARABÉNS BA ANIVERSÁRIU TIC TIMOR I.P BA DA-TOLU

Ministru Prezidénsia ba Konsellu Ministru (PCM), Fidelis Manuel Leite Magalhães, hato’o parabéns ba Ajénsia Tecnologia da informacão e Comunicacão (TIC TIMO I.P) ba da-tolu.
 
“Ha’u hakarak hato’o parabéns ba TIC TIMOR, ba Diretór Ezekutivu no ekipa tomak dezeju atu TIC TIMOR kontinua servisu makaas nune’e ita nian vontade atu lori Governasaun Eletrónika ne’ebé mak pesa importante no save ida ba Governasaun di’ak, la’ós de’it ba prestasaun konta maibé lori servisu ne’ebé diak ho lalais ba to’o iha ita nia sidadaun sira, tenke hadi’a di’ak liu tan ba tinan barak ne’ebé sei mai to’o fim lori liu ksolok  no dezenvolvimentu ida ne’ebé diak liu, inkluzivu ba sidadaun Timor-Leste tomak”. espera ministru PCM.
 
Governante ne’e dehan, TIC TIMOR hahú ho dekretu lei númeru 29 Agostu 2017 hafoin tinan tolu nia laran iha avansu lubuk ida, avansu ida maka antes ne’e  la iha TIC TIMOR enkuantu agora konsege harii no prenxe ona rekizitu ba ninia kuadru sira no kapasidade, kapabilidade téknika enkuantu I.P ida presiza atu iha.
 
Entretantu, agora daudaun TIC TIMOR I.P sei tutela hela iha GPM no hein katak iha tempu badak sei hamriik mesak no sai forte liu tan.
 
“Ita hatene katak TIC sei tutela hela iha Gabinete Primeiru Ministru no seidauk hamriik mesak no ida ne’e seidauk tanba fiskál úniku seidauk iha ne’ebé iha tempu badak sei hamriik loloos hanesan I.P ida, espera iha tempu badak TIC TIMOR bele sai independente no autónomu liu tan” informa Ministru.
 
 Portavós Governu ne’e hateten, iha mudansa iha área informátika nian bainhira prezensa TIC TIMOR iha tanba iha liña ministerial no munisípiu sira halo servisu online ho lalais no di’ak liu, no ema hotu tenke apresia ho saida maka TIC TIMOR fornese.
 
“Espera iha tinan oin mai TIC TIMOR sei halo di’ak liu tan, ita hatene katak iha munisípiu sira agora ne’e bele servisu ho diak liu husi online ida ne’e ha’u haree avansu lubuk hira mak importante TIC halo ona no TIC merese atu hetan ita hotu nia apresiasaun tanba servisu hirak ne’ebé importante kuaze halo iha tinan tolu nia laran”.
 
Alende ne’e ministru mós informa katak, papél TIC nian importante tebes ho nune’e presiza tebes apoiu TIC Timor nian iha área teknolojia ba servisu saida mak estadu atu halo.
 
“ Ita hotu hatene katak durante ne’e parte governu nian enfrenta dezafiu barak iha área informátika  maibé ho estabelesimentu TIC TIMOR no servisu ne’ebé TIC halo, ha’u hanoin iha avansu lubuk ida la’ós de’it servisu ho liña ministerial ba preparativu website, organizasaun interna, informatiza saun ba dijitalizasaun no hadi’a oinsá atu asesu  informasaun ne’e bele to’o munisípiu, TIC mós servisu makas hela iha área infraestrutura telekomunikasaun ba iha desentralizasaun governu nian, ida ne’e tanba kontribuisaun TIC nian” deklara ministru. 
 
Ministru aumenta tan katak “Parte ida importante loos maka foin lalais ne’e promulgasaun husi Prezidente kona-ba lei prevensaun no luta kontra korrupsaun hirak ne’e sei presiza tebes papél TIC TIMOR nian entaun hanesan Ministru PCM ne’ebé tau matan mós ba melloramentu administrasaun publika iha ita nia rain hanoin katak ita nia administrasaun publika sei la presta servisu diak liu ba ita nia sidadaun no sei la presta konta diak liu ba ita nia sidadaun sen ita iha kapasidade ne’ebé forte iha área teknolojia no informasaun tanba ne’e mak ha’u hanoin sei depende mós ba TIC TIMOR nia kontribuisaun no oinsá atu kontinua halo forte liu tan kapabilidade no kapasidade institusionál atu responde ba servisu hirak ne’e” informa Ministru.
 
Governante ne’e mós, husu funsionáriu TIC Timor  atu profunda liu tan relasaun ho entidade sira, Ministériu, Ajénsia tanba buat barak mak presiza atu halo no buat barak mak sei falta iha rain laran, espera ho melloramentu no kapasidade institusionál TIC mós sei halo metin liu tan kolaborasaun ho liña Ministerial sira.
 
“Ita hotu hatene katak, TIC Timor aleinde foun funsionáriu sira mós maioria joven no agora daudaun moris iha mundu globalizadu revolusaun informasaun no teknolojia tanba ne’e presiza kontribuisaun hodi kontinua servisu ho laran la’ós de’it ho objetivu atu presta servisu diak ba estadu maibé kontinua ho vontade ne’ebé forte atu kapasita sira nia an tanba futuru aban bainrua ne’e sei depende ba kompetisaun liu-liu iha área ne’ebé mak TIC hola parte ba, tanba ne’e mak husu ba Diretór Ezekutivu no staff sira hotu atu kontinua fó laran ba servisu no labele atu para hodi aprende  tanba teknolojia hanesan área ida ne’ebé aprende sen fim” ministru ne’e esklarese. #Media TIC#