TÉKNIKU AJÉNSIA TIC TIMOR I.P HALA'O KONEKSAUN REDE INTERNET BA FUNSIONÁRIU AUTORIDADE MUNISÍPIU ERMERA NO LIQUIÇA

Ekipa Tékniku Ajénsia Teconologia da Informação e Comunicação (TIC) TIMOR. I.P halo koneksaun rede internet ba funsionáriu sira iha Autoridade Munisípiu Ermera no Liquiça.
Iha biban ne'e mós, tékniku sira halo teste performa liña Fibra Ótika Terrestre (FOT) husi Munisípiu ba iha Central nomós halo konfigurasaun ba Voice Over Internet Protocol (VOIP).
Objetivu husi ligasaun ne'e, atu fasilita funsionáriu sira nia servisu, hodi asesu ba sistema Freebalance no Dalan ba Futuru (DBFT) tanba durante ne'e sai preokupasaun boot ba sira nia servisu iha Munisípiu.
 Administradór Munisípiu Ermera José M. Soares iha nia entrevista hateten, durante ne'e susar tebes hodi asesu ba liña internet no hein katak, ho ligasaun ida ne'e bele fasilita servisu Autoridade Munisípiu nian liu-liu ba sistema freebalance tanba dala barak atu halo aprovasaun ba proposta ruma tenke han tempu ne'ebé kleur.
Nia mós sujere ba governu, liu husi Ajénsia TIC TIMOR I.P atu halo mós ligasaun liña internet ba Postu Administrativu sira, atu bele fasilita servisu administrasaun tanba dala barak atu haruka karta ba Postu Administrativu sira han  tempu tanba ne'e presiza koneksaun liña internet iha ne'ebá hodi haruka karta tuir via email.
Alende ne'e, Sekretáriu Administrasaun Munisípiu Liquiça Renato Neves hateten, hafoin asesu ba rede Fibra Ótika Terrestre bele fasilita sira nia servisu tanba liña internet ne'ebé lais tebes.
Nia mós husu ba TIC TIMOR I.P atu fasilita tékniku iha Munisípiu refere atu atende servisu tékniku tanba durante ne'e sira iha de'it tékniku ida hodi ajuda servisu tékniku nian.
Hatán ba ida ne'e, Tékniku TIC TIMOR I.P Francisco Ximenes hateten, Ajénsia halo ona rekrutamentu Tékniku  ba Munisípiu 12  no iha  fulan Agostu nia laran Tékniku hirak  ne'e  bele hala'o nia servisu iha  Munisípiu hodi halo atendementu ba  liña internet iha Munisípiu hotu.
Nia mós informa katak, Ajénsia iha planu atu fó formasaun ba tékniku sira tanba ne'e iha posibilidade boot ba Tékniku Munisípiu Liquiça atu hola parte mós iha formasaun refere.
Entretantu funsionáriu sira ne'ebé asesu ba liña internet maka hanesan, Gabinete Administradór Munisípiu, Diresaun Finansas Munisipál, Diresaun Rekursu Umanu no Diresaun Aprovizionamentu #Média TIC#.