Tékniku Ajénsia TIC TMOR I.P Kontinua Halo Teste ba Koneksaun Fibra Ótika Terestre iha Munisípiu Baukau no Vikeke

 BAUKAU 29 MARSU 2019

Ekipa tékniku husi Ajénsia Tecnologia da Informação e Comunicação (TIC) TIMOR I.P kontinua halo teste final ba koneksaun rede Fibra Ótika terrestre iha Munisípiu Baukau no Vikeke.

Bainhira halo teste ba koneksaun refere, Administradór Munisípiu Baukau Antônio Guterres dehan, oras ne'e sira nia parte iha ona tékniku ida ne'ebé durante ne'e hala'o knaar iha Administrasaun Munisípiu ne'ebá tanba ne'e Administradór husu ba Ajénsia TIC Timor I.P bainhira fó treinamentu ba tékniku sira bele fasilita mós tékniku ne'e atu bele ajuda iha munisípiu Baukau.

Ho nune'e Jestór Ajénsia TIC Timor I.P André Marques dehan, Ajénsia mós iha ona planu atu rekruta tékniku sira hodi apoiu iha Munisípiu 12 tanba ne'e iha munisípiu ne'ebé iha ona tékniku, Ajénsia TIC TIMOR I.P bele fasilita hodi tuir formasaun atu aumenta sira nia kapasidade hodi apoiu iha Munisípiu .

Husi Vikeke Administradór Munisípiu Vikeke Gregório Henrique mós kontente ho koneksaun rede Fibra Otika iha Administrasaun Munisípiu refere tanba antes ne'e rede internét falla beibeik no Administradór rasik bolu ona ekipa tékniku sira atu rezolve maibé to'o oras ne'e seidauk rezolve.

"Ha'u sente haksolok tebes ho instalasaun ida tanba durante ne'e ami nia rede sempre falla bainhira ami uza sistema FreeBalance ne'e araska tebes no ami mós koko bolu tékniku sira atu rezolve maibé la konsege tanba ne'e ho koneksaun Fibra Ótika bele fasilita ami nia servisu,” informa administradór.

Ho nune'e Jestór Infraestrutura Ajénsia TIC Timor I.P dehan, iha tempu badak TIC Timor I.P sei tau tékniku iha munisípiu ida- ida hodi fó asisténsia.

Entretantu Ekipa tékniku TIC Timor I.P mós kontinua halo instalasaun iha Munisípiu Manufahi, Kova-Lima no Ainaru. # MÉDIA #TIC