TÉKNIKU TIC TIMOR I.P FÓ TREINAMENTU JESTAUN ADMINISTRASAUN WEBSITE NO SISTEMA EMAIL-OFISIAL BA IPB

Tékniku Ajénsia Tecnologia da Informação e Comunicação (TIC) TIMOR I.P, liu husi Divizaun Dezenvolvimentu Sistema Aplikasaun (DSA) no Divizaun Infraestrutura fó treinamentu kona-ba jestaun administrasaun website no sistema Email-Ofisial ne’ebé TIC TIMOR dezenvolve ona ba Institutu Politéknika Betano (IPB), Kay Rala Xanana Gusmão. Objetivu husi treinamentu ne’e, atu fó koñesimentu ba tékniku sira husi IPB atu nune’e bele entrega no jere rasik sira nia website no Email-Ofisial. Tékniku TIC TIMOR I.P Sarmento Tong, hanesan treinadór informa, ida ne’e hanesan treinamentu dahuluk no sei iha treinamentu ba faze daruak ne’ebé sei planu hela. Daudaun ne’e, tékniku IPB sira iha ona koñesimentu ba sira nia website no DSA sei fó tempu ba sira hodi familiariza website refere ho nia dashboard ka administradór atu nune’e iha formasaun tuir mai sei bele fó koñesimentu kle’an iha área jestaun fixeiru sira nian. Nia dehan TIC TIMOR sei atribui sertifikadu ba tékniku IPB sira ne’ebé konsege finaliza treinamentu ba faze daruak nian. Iha fatin hanesan, Elísio António Ximenes, hanesan partisipante, agradese tanba bele tuir treinamentu refere tanba ida ne’e hanesan priviléjiu boot ida ba IPB atu iha website rasik no sira nia parte mós satisfás tebes ba website ne’ebé kria husi TIC TIMOR hodi hafasil sira hodi bele publika informasaun loroloron ba iha website ne’ebé TIC TIMOR prepara ona. “Iha treinamentu ne’e mós aprende kona-ba layout website ne’e no prátika ba utiliza informasaun iha website refere. Alende ne’e aprende mós kona-ba webmail ninian atu hafasil ami bainhira manda mensajen ruma liu husi email tanba funsionáriu hotu-hotu iha IPB tenke iha email ofisial,” nia informa. Entretantu ,Sira nia parte sujere ba TIC TIMOR, atu nafatin kontribui ba instituisaun sira la’ós de’it iha nasionál maibé presiza mós ba iha munisípiu sira tanba iha instituisaun no universidade balun ne’ebé maka seidauk iha website no hein katak, TIC TIMOR hanesan instituisaun Governu nian, ba oin tenke fó treinamentu iha munisípiu no karik atu kria buat ruma tenke halo peskiza ida tanba dala barak ema asesu liu iha Facebook maibé ladún asesu ba website.