TIC TIMOR I.P ASINA MoU HO ANAS I.P BA KOOPERASAUN SERVISU INFORMÁTIKA

Ajénsia Tecnologia da Informação e Comunicação (TIC) TIMOR I.P, asina memorandu entendimentu ho Autoridade Nacional Agua e Saneamento (ANAS) I.P ba kooperasaun servisu iha área informátika nian. Objetivu husi asina nota entendimentu ne’e, atu fó apoiu kona-ba servisu informátika sira ne’ebé ANAS I.P presiza hafoin enkontru ne’ebé TIC TIMOR halo ho ANAS I.P liu-liu oinsá atu identifika apoiu sira ne’ebé maka ANAS I.P presiza imediatamente bazeia ba pedidu ne’ebé maka hato’o ba TIC TIMOR. ANAS presiza tebes servisu báziku sira kona-ba website, kria email ofisial ba ANAS no haree mós kona-ba kriasaun baze de dadus ba ANAS I.P. Iha entrevista ho jornalista sira, Diretór Ezekutivu TIC TIMOR I.P, Roberto Caitano de Sousa Vicente informa, TIC TIMOR nia papél atu fó solusaun ba instituisaun estadu sira ne’ebé presiza iha área informátika, hahú husi dezenvolvimentu aplikasaun, plataforma eletróniku, kria ba servisu eletróniku sira, haree kona-ba konetividade. Ho kooperasaun ida ne’e, ANAS ho nia pesoál sira iha munisípiu 12 sira mós bele aproveita fasilidade kabu Fibra Ótika Terrestre ne’ebé maka Governu iha. “Ho fasilidade ne’ebé maka konklui iha tinan 2019, ANAS I.P iha nivel munisípiu sira bele uza fasilidade ne’ebé maka TIC TIMOR iha no iha data center TIC TIMOR nian atu asesu informasaun sira ne’e, lokál signifika laiha internet mós bele asesu servisu báziku sira hanesan email, website sira ho koneksaun lokál,” dehan Xefe Ezekutivu. Alende ne’e, TIC TIMOR mós halo ona kooperasaun ho instituisaun estadu 44 resin ne’ebé maka konkorda atu halo kooperasaun ho nia servisu ne’ebé la hanesan tuir sira nia nesesidade TIC TIMOR servisu iha área informátika bazeia ba nesesidade kada instituisaun tanba barak maka sentraliza sira nia sistema TIC TIMOR hanesan PNDS iha munisípiu 12 sira sentraliza hotu ona sira nia sistema informátika iha TIC TIMOR. Iha fatin hanesan, Prezidente no Diretór Ezekutivu ANAS I.P, Domingos Pinto hatete, hafoin asina nota entendimentu ne’e, ANAS I.P sei avansa lalais ho prosesu tékniku sira atu nune’e komesa iha ona sinkronizasaun entre TIC TIMOR ho ANAS oinsá komesa kria kondisaun kona-ba baze de dadus sira nomós oinsá atu halo dokumentasaun sira. Nia dehan, razaun estabelese kooperasaun ida ne’e ANAS hanesan Ajénsia foun ida ne’ebé hala’o funsaun ne’ebé importante tebes nia sai hanesan Ajénsia ida ne’ebé maka iha polítika nasionál ba área rekursu bee inklui bee ba agrikultura, indústria, komérsiu, ba atividade bee hotu-hotu nia maka sei regula no nia iha funsaun lubuk ida hanesan monitoriza no fiskaliza tanba ne’e, presiza kria kondisaun ne’ebé seguru nune’e iha kontinuasaun ba futuru. Entretantu, memorandu entendimentu ne’e, asina direta husi Diretór Ezekutivu TIC TIMOR I.P, Roberto Caitano de Sousa Vicente ho Prezidente no Diretór Ezekutivu ANAS I.P, Domingos Pinto iha edifísiu ANAS I.P Kaikoli. #MÉDIA TIC#