TIC TIMOR I.P. ATRIBUI SERTIFIKADU BA FORMANDU NA’IN-HAAT HOSI MINISTÉRIU SAÚDE

Ajénsia Teknolojia Informasaun no Komunikasaun (TIC) TIMOR I.P., liuhosi Divizaun Dezenvolvimentu Sistema Aplikasaun (DSA), atribui sertifikadu apresiasaun ba formandu na’in-haat  hosi Ministériu Saúde (MS), ne’ebé tuir treinamentu kona-ba jestaun administrasaun portál Ministériu Saúde nian durante loron tolu iha Timor Plaza. 

Iha serimónia enseramentu ne’e, Diretór Divizaun Dezenvolvimentu Sistema Aplikasaun, Justo Fernandes hateten, sertifikadu ne’e nu’udar apresiasaun ba ekipa hosi Ministériu Saúde ne’ebé tuir formasaun durante loron tolu maske iha formasaun nia laran CMS ne’ebé uza, ninia módulu barak ne’ebé hanorin formandu sira, nune’e, bainhira problema mosu iha website, sira bele rezolve rasik.

Nia dehan, hosi parte TIC TIMOR sei fornese mós apoiu tékniku tanba ida-ne’e, parte hosi kompromisu TIC TIMOR nian ne’ebé mensiona iha Services Level Agreement (SLA) katak fó pakote kompletu signifika katak hosi rekolla rekizitu sira, análize, dezeñu nomós dezenvolve website, treinamentu no apoiu tékniku inklui manutensaun.

Entretantu atividade ida-ne’e, nu’udar pakote ida, ne’ebé maka TIC TIMOR fornese ba liña ministériu hotu-hotu no hafoin treinamentu ne’e ramata, sei foka iha manutensaun nomós apoiu tékniku bainhira iha difikuldade presiza asisténsia ruma hosi TIC TIMOR, iha parte tékniku prontu atu kolabora.  #MEDIA TIC#