TIC TIMOR I.P PRONTU APOIU MS BA DIJITALIZASAUN PROGRAMA SnF

Diretór Ezekutivu Ajénsia Tecnologia da Informação e Comunicação (TIC) TIMOR I.P,Roberto Caitano de Souusa Vicente, ho ekipa hala’o enkontru ho Vise Ministru Saúde (MS)  Bonifácio Maucoli dos Reis, hodi ko’alia kona-ba oinsá TIC TIMOR I.P fó apoiu ba dijitalizasaun programa Saúde na Família (SnF) ne’ebé sei re-ativa fila fali iha tempu badak nia  laran hodi haforsa  prestasaun servisu Kuidadu Saúde Primária nian.
 
Iha enkontru ne’e Xefe Ezekutivu informa, Ministériu Saúde durante ne’e, hola parte hanesan kliente Ajénsia TIC TIMOR nian tanba iha servisu konetividade ne’ebé maka sentraliza ona iha TIC TIMOR.
 
Kona-ba asuntu dijitalizasaun, TIC TIMOR konkorda hodi bele asume responsabilidade no ekipa Divizaun Aplikasaun sei hala’o enkontru tékniku ho ekipa husi MS atu ko’alia kle’an liu tan oinsá atu dezenvolve sistema ida ne’e, hodi sentraliza iha data center TIC TIMOR nian hodi asegura informasaun Governu nian.
 
Ho nune’e, Vise Ministru Saúde agradese ba disponibilidade TIC TIMOR nian hodi apoiu programa vizita Saúde na Família (SnF) no vizita domiciliary ne’ebé hakbesik liután prestasaun servisu ba agregadu família sira nune’e bele asegura dadus utente sira-nian.
 
Entretantu enkontru refere, hala’o iha salaun enkontru Palácio das Cinzas, Ministériu Saúde, Caicoli, Dili.#MÉDIA TIC#