TIC TIMOR I.P REALIZA WORKSHOP HODI HALO AVALIASAUN DEZENPEÑU SERVISU

Ajénsia Tecnologia da Informação e Comunicação (TIC) TIMOR I.P, realiza workshop hodi halo avaliasaun dezempeñu kona-ba servisu TIC TIMOR nian. Objetivu husi workshop ne’e, hanesan avaliasaun ida tanba hahú tama ona iha tinan klaran husi siklu orsamentu tanba ne’e, hanesan oportunidade di’ak atu bele halo fila fali revizaun ho hanoin ida katak, bainhira tenta atu halo revizaun agora bele reajusta fila fali programa, sub programa no planu sira ne’ebé maka iha, to’o tinan remata. Iha intervensaun, Diretór Ezekutivu TIC TIMOR I.P, Roberto Caitano de Sousa Vicente hatete, TIC TIMOR la’o ona iha tinan tolu nia laran ho vizaun ne’ebé maka naruk no iha mehi katak, saida maka hakerek iha dekretu lei númeru 29/2017 tenke alkansa maske la hotu maibé karik buat ne’ebé promete bele realiza tuir planu estratéjiku ne’ebé maka iha to’o 2030. “Ajénsia ne’e, sei susesu bainhira hotu-hotu kompriende saida maka atu halo, hahú husi ne’ebé foti responsabilidade ba servisu ne’ebé ajénsia iha,” Xefe Ezekutivu informa. Diretór mós apela ba funsionáriu hotu tenke servisu hamutuk hodi alkansa objetivu ne’ebé iha no fó mós kontribuisaun hodi servisu hamutuk. “Tenta atu mellora di’ak liu tan koordenasaun servisu ema idak-idak iha ne’e, atu fó resposta ruma no bainhira identifika problema tenke fó solusaun” Diretór apela. Iha biban ne’e, halo mós aprezentasaun kona-ba servisu TIC nian ho instituisaun estadu sira, planu annual relasiona TIC ho nia orsamentu inklui instituisaun sira ne’ebé maka koopera ona ho TIC TIMOR no instituisaun sira ne’ebé seidauk koopera ho TIC TIMOR. Alende ne’e, Xefe Divizaun sira mós atualiza sira nia progresu servisu ne’ebé durante hala’o ona inklui mós diskusaun entre funsionáriu sira ba avaliasaun servisu TIC TIMOR nian. #MÉDIA TIC#