TIC TIMOR PRONTU APOIU MAE IHA ÂMBITU PORTAL MUNISIPÁL

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, ho nia ekipa hala’o enkontru ho Ministru Administrasaun Estatál (MAE) Interinu, Abilio José Caitano ho ekipa, hodi ko’alia kona-ba koperasaun ho MAE iha âmbitu portal munisipiu hodi fasilita servisu no asesu portal munisipiu ne'ebé lais no seguru liu hodi promove munisipiu nia atividade no kontribui ba programa Governu Eletróniku.
Iha enkontru ne’e Xefe Ezekutivu informa, Papél importante Ajénsia nian maka oinsá atu sentraliza sistema Governu tomak iha fatin ida hodi bele fornese servisu ne’ebé maka lalais ba instituisaun Governu sira nomós ba populasaun sira.
 
Nia dehan, Iha semana kotuk MAE lansa ona portal Munisípiu signifika loke ona nune’e papél importante TIC nian oinsá atu hadi’a liu tán atu povu sira bele asesu ba website lalais liu.
 
 Tanba agora dadauk portal hosting iha liur entaun kualkér asesu ba portal munisípiu tenke iha asesu ba internet maibé bainhira hosting ona iha data center TIC TIMOR  nian, sei la presiza asesu ba internet no asesu ne’e lokál de’it tanba uza ona ekipamentu Fibra Ótika Terrestre (FOT) ne’ebé Governu dada hamutuk ho projetu eletrisidade.
 
Diretór ne’e salienta tan katak, kada munisípiu agora dadauk iha ligasaun direta ona ba iha data center TIC TIMOR  entaun bainhira website ne’e hosting iha data center TIC nian bainhira sira tau http://www.portalmunicipal.gov.tl/ sira la ba USA maibé iha Timor-Leste de’it.
 
Ho nune’e Ministru Administrasaun Estatál Interinu, Abilio  José Caitano hatete, nia parte laiha objesaun ruma bainhira servisu hamutuk ho TIC TIMOR.
 
Nia mós konkorda no husu ekipa TIC TIMOR atu iha tempu badak bele halo aprezentasaun ba Diretór sira nomós Administradór sira nune’e bele iha koñesimentu kona-ba TIC TIMOR nian no bele servisu hamutuk iha futuru.   #Média TIC#