VISE DIRETÓR EZEKUTIVU TIC TIMOR I.P APREZENTA WEBSITE VERSAUN IKUS BA MESSK NO SEAK

Vise Diretór Ezekutivu no Diretór Aplikasaun Dezenvolvimentu Sistema, Ajénsia Tecnologia da Informação Comunicação (TIC) TIMOR I.P, Justo Fernandes, aprezenta website versaun ikus Ministériu Ensinu Superior, Siénsia no Kultura nian ba Ministru Ensinu Superior, Siénsia no Kultura (MESSK), Longuinhos dos Santos no Sekretáriu Estadu Arte no Kultura (SEAK), Teófilo Caldas, hodi hetan apresiasaun final.

Iha aprezentasaun ne’e, Vise  Diretór Ezekutivu informa, Ajénsia TIC TIMOR I.P la’ós dezenvolve website ba MESSK de’it maibé ida ne’e, papél Ajénsia nian atu dezenvolve ba  ministériu hotu-hotu tanba Ajénsia maka responsabiliza ba implementasaun Governu-Eletróniku iha rai laran. Website ne’ebé Ajénsia dezenvolve bazeia ba rekizitu ne’ebé mai husi Ministériu ne’e rasik.

Iha biban ne’e, MESSK, Loguinhos dos Santos, agradese no apresia tebes ba ekipa TIC TIMOR I.P, ne’ebé konsege dezenvolve ona website ministériu nian tanba ida ne’e, haree husi kapasidade institusionál nian no ba futuru sei iha kolaborasaun di’ak liu tan kona-ba oinsá monta mós sistema kona-ba dadus estatístika nian.

Nia afirma, website ida ne’e, di’ak ba ministériu atu bele transforma informasaun ba iha nivel mundiál nomós nasionál no ba futuru mensiona mós atividade kultura nian iha website nune’e bele promove atividade kultura tanba ida ne’e importante tebes.

Alende ne’e, SEAK, Teófilo Caldas mós, apresia tebes tanba TIC TIMOR fasilita ona ministériu ida ne’e, hodi kria website ida hodi bele hato’o informasaun sira hodi halo promosaun ba iha mundu hodi atrai ema mai vizita Timor-Leste.

Entretantu tuir planu Ministériu nian, website refere sei lansa iha fulan Novembru.  #MÉDIA TIC#