TÉKNIKU TIC TIMOR I.P FÓ TREINAMENTU JESTAUN ADMINISTRASAUN WEBSITE BA EKIPA HUSI KNTLU

Tékniku Ajénsia Tecnologia da Informação e Comunicação (TIC) TIMOR I.P, liu husi Divizaun Dezenvolvimentu Sistema Aplikasaun (DSA) fó treinamentu kona-ba jestaun administrasaun website ba ekipa husi Komisaun Nasionál Timor-Leste ba UNESCO (KNTLU). Iha treinamentu refere, akompaña direita husi Diretór Dezenvolvimentu Sistema Aplikasaun (DSA), Justo Fernandes, iha biban ne’e Diretór hateten, treinamentu ida ne’e presiza aumenta tan tanba seidauk sufisiente, presiza atu prátika kedan. “Treinamentu ida ne’e, la sufisiente se bainhira la iha background IT, ha’u mai iha ne’e hodi akompaña direita hodi haree oinsá prosesu treinamentu ne’e, tuir ha’u nia haree treinamentu ida ne’e la sufisiente ho nune’e presiza buka tempu tan oinsá mak atu pratika kedas, bainhira remata treinamentu ida ne’e, ita boot sira fila ba iha servisu fatin hetan difikuldade ruma ekipa TIC nian prontu atu fó asisténsia téknika ba informasaun sira hotu” dehan Diretór ne’e. Vise-Diretór Ezekutivu ne’e haktuir tan katak, tuir ninia observasaun durante ne’e website instituisaun Governu nian dalabarak ema foku liu ba notísia, estrutura, no informasaun ba servisu nian iha ne’ebá ema ladún fó importánsia tanba ne’e, bainhira ema vizita website sira ne’e haree de’it mak naran no kategoria de’it mak iha maibé informasaun sira ne’e la iha, bainhira dehan pájina ofisial tenke tenta oinsá atu tau informasaun sira ne’ebé kompletu iha website ofisial refere mak foin share ba iha pájina facebook hodi nune’e bainhira ema lee fontes informasaun ne’e bele dehan loos, tanba durante ne’e informasaun ne’ebé espalla iha facebook hoax mak barak tanba la iha ema ida mak atu kontrola. Nia realsa tan katak, tenta nafatin ba instituisaun estadu sira hotu atu sosializa ida ne’e, hodi informasaun hirak ne’ebé atu fahe iha facebook ne’e tenke mai husi website ofisial. Iha fatin hanesan, Tékniku TIC TIMOR I.P Sarmento Tong, hanesan treinadór hateten, objetivu husi treinamentu KNTLU ida ne’e, hodi fó kapasitasaun ba funsionáriu tékniku KNTLU nian hodi bele halo administrasaun no jestaun website KNTLU nian. Iha sesaun dahuluk, ekipa tékniku TIC TIMOR I.P. liu husi DSA organiza eventu ida hodi treina ekipa tékniku KNTLU nian atu jere no atualiza sira nia website durante loron tolu, hodi nune’e, ekipa tékniku KNTLU bele jere rasik sira nia website iha futuru. Durante treinamentu ida ne’e, ekipa DSA halo hands on training hodi fó oportunidade ba ekipa KNTLU atu bele atualiza informasaun, imajén no organograma sira ne’ebé sei falta ba iha website refere. Iha sesaun daruak ne’ebé sei organiza, ekipa téknika TIC TIMOR I.P. sei organiza hodi haree finalizasaun husi update ba website. No treinamentu ida ne’e sei remata ho fahe sertifikadu ba kada pesoál sira. #Média TIC #