DIRETÓR EZEKUTIVU AJÉNSIA TIC TIMOR I.P., HALA’O ENKONTRU REGULAR HO S.E. PRIMEIRU-MINISTRU

Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente, hala’o enkontru regular ho S.E. Primeiru-Ministru, Sr. Taur Matan Ruak hodi atualiza progresu servisu Ajénsia TIC TIMOR nian liu-liu kona-ba atinjementu Governu Eletróniku no hetan mós orientasaun hosi S.E. Primeiru Ministru kona-ba servisu ne’ebé sei hala’o iha futuru.

Parte hosi programa importante ne’ebé, bele hatuur servisu ne’ebé iha liu-liu ba esforsu ne’ebé atinje ba iha reforma administrativa nian iha projetu rua ida maka ezbosu ne’ebé submete ona ba Primeiru-Ministru atu hetan aprovasaun hosi Konsellu Ministru.

“Dokumentu Estratéjiku sira ne’e ita hanaran Timor Dijitál hosi 2022 to’o 2030 no dokumentu sira ne’e, bainhira aprova sei sai baze ba esforsu Dizitalijasaun Governu tomak hahú hosi tinan ida ne’e to’o iha perspetiva 2032 bainhira ita bele hatene katak ita nia nasaun ne’e Digitalizadu,” dehan Diretór Ezekutivu ba jornalista sira hafoin hasoru malu ho S.E. Primeiru-Ministru.

Xefe Ezekutivu esplika, bainhira hetan aprovasaun hosi Konsellu Ministru, dokumentu sira ne’e mós sai hanesan dokumentu prinsipál sira hotu bainhira parseiru Dezenvolvimentu sira hakarak ajuda nia Liña Ministeriál sira hodi bele konsulta didi’ak planu Governu nian no estratéjia Governu nian ne’ebé hanaran Estratéjia Dijitál Timor.

Hanesan mós liña Ministerial sira bainhira atu dezenvolve sira nia sistema hanesan, Saúde , agrikultura no seluk-seluk tan, Dokumentu ne’e  sai hanesan referénsia ka baze ba sira atu dezenvolve sira nia polítika dizitalijasaun ba iha liña Ministerial relevante sira.

“Segundo maka hanesan, agora daudaun ita hahú ona ho projetu importante ida ligadu ba atinje reforma administrativa maka hanesan projetu ida naran projetu Identidade Úniku. Projetu ida ne’e, ho hanoin ida atu atribui númeru Dijital ida ba iha ita nia populasaun ka sidadaun tomak hahú hosi nia moris to’o nia mate, estadu sei atribui nia ho númeru Identidade Úniku ida para nia uza atu asesu ba servisu ne’ebé maka ita nia Governu fó ka setór privadu sira fó,” Xefe Ezekutivu informa.  

Diretór Ezekutivu esplika liu tan katak, númeru Identifikadór Úniku ne’e uza hodi asesu ba servisu Governu nian, entaun projetu ida ne’e hetan no hala’o hafoin hetan aprovasaun hosi Konsellu Ministru. Hosi 2022 hetan ona mós aprovasaun atu prosesu aprovizionamentu ne’ebé maka sentraliza iha komisaun Nasional Aprovizionamentu.

Objetivu prinsipál ida kona-ba projetu Dijitál Timor ne’e maka atu dijitaliza servisu sira hotu, oras ne’e dadauk sei la’o ho servisu sira ne’ebé maka Manual maibé ho esforsu ne’ebé halo, fiar katak iha futuru mai ida ne’e, bele hahú evita servisu manual no bele oferese plataforma ne’ebé maka Digitalizadu. #MÉDIA#TIC